الصوم المسيحي
علاش المسيحيين كايصومو؟ واش الصوم غير على الماكلة؟ شنو الفرق بين الصوم المسيحي والصيام ديال الديانات الأخرى؟
االصوم فالمسيحية ماشي غير واحد العادة دينية، بل هو علاقة روحية بين الإنسان والله. الصوم مشي غير باش نحرم راسنا من الماكلة، ولكن باش نقرّبو قلوبنا للمسيح، نرجعو لذاتنا، ونجددو علاقتنا بالله. إذن، كيفاش كاينظر الإيمان المسيحي للصوم؟
شنو هو الصوم المسيحي؟
فالمسيحية، الصوم ماشي قانون مفروض، ولكن اختيار حر نابع من القلب. هو وقت كايقرر فيه المؤمن ينقص من الماكلة، أو يمتنع على بعض أنواع الأكل، باش يركّز على علاقته مع الله. ولكن الصوم ماشي غير على البطن، بل حتى على الفكر، والعين، واللسان. يعني، ماشي غير ما كاتاكلش، ولكن حتى ما كاتسبش، ما كاتغضبش، وما كاتفكرش فالأمور لي بعيدة على القداسة.
المسيح بنفسو عطانا المثال، حيت هو بنفسو صام 40 يوم قبل ما يبدا خدمتو(متى 4: 2).
علاش كايصوم المسيحي؟
الصوم عندو بزاف ديال الفوائد الروحية، وأهمها:
1. تقريب من الله 🙏: وقت الصوم كايكون فرصة باش الإنسان يركز على الصلاة وقراءة الكتاب المقدس.
2. التواضع وكسر الكبرياء 😇: ملي كاتصوم، كاتحس بضعفك وكتعرف بلي كلشي النعم لي عندك جاية من الله.
3. التوبة والتنقية 💧: الصوم كيعلمنا نرجعو لذاتنا، ونراجع أفعالنا، ونطلبو المغفرة من الله.
4. التضامن مع المحتاجين ❤️: ملي كاتجوع، كاتحس بشعور الناس لي ما عندهمش باش ياكلو، وهكذا كايزيد القلب ديالك رحمة ومحبة.
كيفاش كايكون الصوم فالمسيحية؟
ما كاينش قانون صارم فالمسيحية على طريقة الصيام، ولكن فالعهد القديم والعهد الجديد كاين أمثلة على أنواع مختلفة:
• صوم كلي: بلا ماكلة ولا شرب لفترة قصيرة (بحال الصوم لي دارو موسى وإيليا).
• صوم جزئي: الامتناع على بعض الأكلات بحال اللحوم والحلويات (بحال الصوم لي دارو دانيال).
• صوم فردي أو جماعي: ممكن تصوم بوحدك، أو مع الكنيسة كاملة فمناسبات معينة.
ولكن أهم حاجة فالصوم ماشي النوع ديالو، ولكن القلب واش فيه صدق ولا غير عادة؟ المسيح قال: “وإذا صمت فلا تكن عابسًا كالمرائين، فإنهم يعبّسون وجوههم لكي يظهروا للناس صائمين” (متى 6: 16). يعني الصوم خاصو يكون بينك وبين الله، بلا رياء ولا تفاخر.
الصوم هو تغيير مشي تجويع!
بزاف كايظنو بلي الصوم هو غير منع الماكلة، ولكن الحقيقة هو تغيير فالقلب والسلوك. الصوم بلا صلاة هو غير ريجيم! الله كايبغي الصوم لي فيه تغيير داخلي، لي كايجعلنا ناس أكثر محبة، أكثر رحمة، وأكثر طهارة.
واش الصوم مجرد عادة دينية، ولا فرصة حقيقية باش تتقرب لله؟ واش مستعد تصوم بطريقة لي تغيّر قلبك، ماشي غير بطنك؟ 🤔✨